Aruba Port Authority a inaugura e tugboat “Colorado”
Published on April 23, 2019
Un inversion grandi pa por ofrece mas y miho servicio na waf. Esun di mas moderno den henter Caribe.
Aruba Ports Authority ta hopi orguyoso di por anuncia oficialmente e yegada di e Tugboat “Colorado”. Un barco sofistica cu ya ta den servicio dunando bon resultado caba. Manera tur hende por corda, e ultimo tugboat cu Aruba tabata dispone di dje tabata Andicuri. Na cierto momento su mantencion a bira dificil y no tabata haya e piesanan facil mas. A opta pa reemplasa cu un barco nobo. Na aña 2016, mientras tabata evaluando compra di esun nobo, a opta pa lease un tugboat temporalmente.
Aruba Ports Authority (APA) a haci un sondeo profundo di e caracteristicanan cu e tugboat nobo mester cumpli cun’e y asina a yega na e decision di cumpra un mas moderno y cu lo por tin un bida hopi largo. A yega na un contracto di construccion cu e compañia DAMEN y un acuerdo cu e compania Svitzer, encarga cu supervision durante construccion y transporte di e tugboat nobo, esta e “Damen Azimuth Stern Drive Tug 2811”. APA ta contento cu e apoyo cu a ricibi den e proyecto aki for di AIB-Bank como agent bank cu a percura pa e tugboat wordo financia door di un consortio di 7 diferente instituto financiero.
APA tin un bon relacion cu Damen cu ta brinda servicio tambe na e tugboatnan di e.o. CITGO, cu ta di mesun marca y nan tin un oficina na nos isla ruman Corsou.
A construi e tugboat “Colorado” na Vietnam, ta un barco di 28 meter largo y 11 meter hancho. A desaroy’e specialmente pa e tipo di lama di Caribe. E tugboat aki ta e prome den su estilo den henter Caribe, pues Aruba Ports Authority awo ta dispone di un tugboat ultra moderno, di e ultimo generacion. Ta un boto masha stabiel cu por ofrece mas y miho servicio.
Manera ta conoci, e barconan crucero ta sigui crece y recientemente APA a adapta e structura di waf pa cumpli cu rekisito di companianan crucero cu ta poniendo barconan mas grandi den operacion. “Colorado” por atende cu e barconan grandi existente y esunnan cu proximamente lo wordo poni den operacion. Y tambe pa asisiti e barconan di container y carga pa asina nan por maniobra mehor den e waf di barcadera.
Gerencia di APA ta gradici su hunta di comisario y gobierno como accionista di e empresa estatal y un y tur cu a coopera y contribui cu e proceso di compra di e tugboat nobo aki y cu awe a yega asina leu di por inaugura “Colorado”. Danki na Gobierno pa e cooperacion, na e personal nautico completo cu lo traha abordo di e tugboat moderno aki, pa cual nan a sigui algun curso y training avansa y specialisa tanto na Aruba como na Hulanda. Aruba pabien.
